රෙජිනා වලව්ව හෙවත් වර්තමාන කොළඹ විශ්වවිද්‍යාලයේ කොලේජ් හවුස් මන්දිරය
===========================================
රෙජිනා වලව්ව හෙවත් වර්තමාන කොලේජ් හවුස් හී නිර්මාතෘ දානපති චාර්ල්ස් හෙන්රි ද සොයිසා ගේ සිවුවැනි පුත්‍රයා වන වරුසහැන්නැදිගේ තෝමස් හෙන්රි ආතර් ද සොයිසා වර්ෂ 1874 දී මොරටුව සොයිසා වලව්වේ උපත ලද්දේය.මොරටුව වේල්ස් කුමර විද්‍යාලයෙන් සහ කොළඹ රාජකීය , ගල්කිස්ස ශාන්ත තෝමස් යන විදුහල් වලින් සිප් සතර හැදෑරූ ඔහු වර්ෂ 1892 දී දිවංගත පියාගේ ව්‍යාපාරයන්ට සම්බන්ධව විය.වර්ෂ 1898 දී සොයිසා පවුලේ මහනුවර කේන්ද්‍රකොට ගත් ව්‍යාපාර සම්පූර්ණයෙන් භාරගෙන කටයුතු කල අතර තමාගේම ව්‍යාපාරද ආරම්භ කලේය.සාමාන්‍ය වෙළඳාම, එවක නව්‍යතම තාක්ෂණයක් වූ වාෂ්පයෙන් බලගැන්වූ යන්ත්‍ර සහිත මිනිරන් පතල් ව්‍යාපාර සහ තේ,පොල්,රබර්,කුරුඳු,පැඟිරි වගාවන්ද ඔහුගේ ව්‍යාපාර අතර වීය.ලංකාවේ විශාලම වතුයායක් වූ වයඹ පලාතේ කීනකැලේ වත්තද ඇතුලුව දිවයින පුරාම ඔහුට හිමි ඉඩම් විය.කොම්පඤ්ඤවීදිය දියතලාව මෝල සහ වැල්ලවත්ත කොහු ගබඩාවන්හී අපනයනයට පෙර ගබඩා කල කොහු,කොහු ලණු,ගුදිරි කොහු, පොල්,
පොල්තෙල්,දිසිඳි පොල්, කොප්පරා, තේ, රබර්,එනසාල්,කොකෝවා,පැඟිරි තෙල්,කුරුඳු සහ මිනිරන් ආදී නිෂ්පාදන අංක 02 ,ඇල වීදිය කොටුව යන ලිපිනයේ පවත්වාගෙන ගිය ඔහුගේ අපනයන ව්‍යාපාරයේ කාර්යාලය හරහා යුරෝපයට අපනයනය කල අතර ආතර් ද සොයිසාගේ කීනකැලේ කොහු නිෂ්පාදන සහ කදිරාන කුරුඳු යන සන්නාමයන්ට යුරෝපයේ සහ ලෝකයේ නොයෙක් රටවලදී ඉහල මිලක් ලැබිණි.කොළඹ ඔහුගේ නිවස බ්‍රොඩී හවුස් නම් වූ අතර කළුතර සහ මීගමුව කදිරානේද ඔහුට අයත් නිවාස විය.
ගාල්ලේ අබේවර්ධන පවුලේ සයිමන් පෙරේරා අබේවර්ධනගේ එකම දියණිය වූ රෙජිනා පෙරේරා අබේවර්ධන සමග වර්ෂ 1899 දී විවාහවූ ආතර් ද සොයිසා විසින් තම බිරිඳගේ නම යොදා තම උරුමයයෙන් ලද ඉඩමක මෙම මන්දිරය ඉදිකරන ලදී.එක්දහස් නවසියයේ මුල් ගණන්වලදී සොයිසා පවුලට හිමි ඇල්ෆ්‍රඩ් හවුස් මන්දිරය ඇතුළු බගතලේ වතුයායට රෙජිනා වලව්වේ සිට ඇල්ෆ්‍රඩ් හවුස් හරහා බම්බලපිටිය මැජෙස්ටික් සිටි දක්වාද සියළු ඉඩම් අයත් විය.1912 දී පමණ ඉදිකිරීම් ආරම්භ කළ තම නමින් ඉදිකල මේ මන්දිරයේ ජීවත් වීමට වාසනාව නොලද රෙජිනා පෙරේරා අඩු වයසින් කළුරිය කළාය.කාලයාගේ ඇවෑමෙන් ව්‍යාපාරයන්ගෙන්ද බංකොලොත් වූ ආතර් ද සොයිසා වර්ෂ 1920 දී පමණ එවක සිලෝන් යුනිවර්සිටි කොලීජිය ආරම්භ කිරීම වෙනුවෙන් බ්‍රිතාන්‍ය ආණ්ඩුවට මෙම ගොඩනැගිල්ල විකුණා ඇත.
(උපුටා ගැනීම සන්ද්‍යා බටුගහගේ දමන ලද ලිපියකින්) දෙරන my city වැඩසටහනින්
No comments:
Post a Comment